Falam Christian Church of Chicago

Constitution & Bylaws 2015

(written by Rev. Dr. Biak Hlei Mang)

(1st Amendment 2020)

Daan Hrampi (Church Constitution)

I. Hmin

  1. Hih Kawhhran cu Falam Christian Church of Chicago (FCCC) ti’n kawh a si ding.

    II. Hmun

  2. Falam Christian Church of Chicago ih Pathian biakkhawmnak hmun cu: 493 Forest Avenue, Glen Ellyn, IL 60137 ah a si ding.

    III. Pehtlaihnak

  3. Pawlkom dang thawn pehtlaihnak ah Chin (Falam) ṭong a hmangtu Chin Baptist Association, North America (CBANA) ah sungtel a si ding.

IV. Tumtahmi

       Falam Christian Church of Chicago ih tumtahmi pawl cu:

  1. Sersiamtu Pathian cu Thlarau a si vekin thlarau le thutak in biakkhawm ding (Johan 4:24). Pathian cu kan taksa, kan thinlung, kan thlarau thawn, awnmawi le kan aw neihzat in thangṭhat ding (Saam. 96, 150), le a rundamnak thuthangṭha cu phuansuah ding a si (Mat. 28:19-20).

  2. Kawhhran sungtel hmuahhmuah cu taksa, thinlung, thlarau, le thutak in pawlkom-awknak nei in Pathian kan thangṭhat tlang ding ih a hna kan ṭuantlang ding (Johan 10:10).

  3. Kawhhran sungtel pawl lungawi caan ah siseh, riahsiat ninghan caan ah siseh, dam lo caan ah siseh, kan zumi Bawi Khrih hmin in bawm-awk tlang ding (Rom 12:15). Cuihtlunah miharsa dang le bomṭul pawl khal bawmtlang ding (Mat. 25:31-40).

  4. Thlarau Thianghlim ih lamhruainak in kawhhran sungtel hmuahhmuah in Pathian ram karhzainak ding le a hmin sunlawinak ding hrangah mah le titheitawk ih nung ding le ṭuan ding (1Kor. 10:31).

    Pathian pekmi kan Chin (Falam) ṭong le kan nunphung pawl hi a cang theitawk in kilkhawi, humhim, le ṭhansoter ding.

V. Zumnak Thurin (Doctrines)

Pathian (God)

  1. Kan biakmi Pathian pakhat lawng a um ti kan zum (Mipum. 6:4; Suah. 20:3). Kan Pathian cu lei le van sersiamtu Pathian a si tiah kan zum (Seem. 1:1). Kumkhua ih a nungmi Pathian (Seem. 21:33; Saam. 90:2), Rundamtu Pathian (Luka 2:11; Johan 4:42) a si tiah kan zum.

  2. Kan biakmi Pathian cu thumthlak Pathian: Pa le Fapa le Thlarau Thianghlim a si tiah kan zum (Mat. 28:19; 2Kor. 13:14).

Jesuh Khrih (Jesus Christ)

  1. Jesuh Khrih cu Pathian Fapa a si (Johan 3:16) ih Thlarau Thianghlim hnaṭuannak thawngin nuthianghlim (virgin) Mary sungin a suak (Luka 1:27; Hebru 2:14). Jesuh Khrih cu thumthlak Pathian lakih telmi a si tiah kan zum (Mat. 28:19).

  2. Jesuh Khrih cu kan sualnak ruangah thinglamtah parah thihnak a tuar ih nithum hnu-ah thlan ihsin a thosal ih Pa hnenah a feh (1Kor. 15:4). Ni netabik ah leitlun ah a rung ṭumsal ding ih thu a ṭhen ding (Mat. 16:27; 2Kor. 5:10) tiah kan zum. Jesuh Khrih cu Puithiam Sang (Hebru 4:14), Profet (Luka 13:33; Johan 6:14), Siangpahrang (1Tim. 6:15) a si tiah kan pom.

Thlarau Thianghlim (Holy Spirit)

  1. Thlarau Thianghlim cu thumthlak Pathian sungih ummi pakhat a si (Mat. 28:19). Thlarau Thianghlim cu Jesuh Khrih van ih a kai hnu-ah hnaṭuantu a si (Johan 14:16). Thlarau Thianghlim ih hnaṭuan cu zumtu pawl ih nunnak ah hnangamnak, lungdaihnak, le thinnemnak a thlenter (Johan 15:26).

  2. Zumtu pawl Pathian kan hngilh tikah Pathian in theihtersal. Zumtu pawl sualnak lamzin feh ding in siang lo ih nun in simtu le lam in hmuhtu khal a si (Johan 16:13).

Bible Thianghlim (Holy Bible)

  1. Kan Bible hi Pathian ih thawkkhummi a si ih thutak zirh-awknak ah siseh, zumnak hrangah siseh, nunsim-awknak hrangah siseh a kimbik, a tlamtlingbik, le a ṭhabik a si tiah kan pom (2Tim. 3:16).

  2. Kan Bible hi nunnak ding lam in hmuhtu a si tiah kan pom. Thukam Thar ih in zirhmi hmuahhmuah hi kawhhran ih thlun ding, tuah ding, le hman ding a si tiah kan pom (Saam. 119:105).

  3. Kan Bible Thianghlim a simi Thukam Hlun le Thukam Thar hi Pathian ih thawkkhummi a si ih a palh lo a si tiah kan pom (Mat. 5:17-18).

Minung (Man)

  1. Minung cu Pathian hmuihmel keng ih sersiammi kan si (Seem. 1:27). Asinain Adam le Eve ih sualnak ruangah leitlun mi hmuahhmuah cu misual kan si (Rom 3:10-12; 1Johan 1:8). Rundam ṭulmi kan si (Rom 7:18-20).

  2. Pathian ih zaangfahnak ruangah le Jesuh Khrih kan zumnak, rinsannak thawngin a zumtu hmuahhmuah cu rundam fa kan si (Efesa 2:8).

Rundamnak (Salvation)

  1. Minung cu misual kan si ih rundam ṭulmi kan si vekin Pathian zaangfahnak ruangah Jesuh Khrih kan zumnak thawngin rundammi kan si tiah kan zum (Efesa 2:5; 1Johan 1:9).

  2. Jesuh Khrih lo cun rundamnak a um lo a si tiah kan pom (Tirh. 4:12).

Thuṭhennak (Judgment)

  1. Kan zummi Bawi Jesuh Khrih ih a ti vekin ni netabik ni ah Jesuh Khrih cu leitlun ah thuṭhen dingin a rung ṭumsal ding (Mat. 16:27).Amah a zumtu hmuahhmuah cu kumkhua nunnak co dingah van ah a hruai ding ih amah a zum lotu hmuahhmuah cu hell ah a thla ding a si tiah kan zum (2Piter 1:11; Johan 3:8).

Kawhhran (Church)

  1. Jesuh Khrih a zumtu pawl hmunkhatte ih umkhawmmi le umnak hmun cu kawhhran a si (Mat. 16:18; Rom 12:5). Kawhhran ih Lu cu Jesuh Khrih a si ih kawhhran cu Jesuh Khrih ih ruangpum a si (Kolose 1:18). Kawhhran cu Jesuh Khrih ih mothar khal a si (Thup. 21:9).

  2. Kawhhran sungtel pawl cu pumkhatte in, hmunkhat ah Pathian biaktlang, thla camtlang ding, zirh-awk ding, thapek-awk ding, bawm-awk ding a si tiah kan pom (Johan 17:21).

Baptisma-Tihnimnak (Baptism

  1. Jesuh Khrih cu i rundamtu le ka Bawipa a si ti ih a zumtu hmuahhmuah lawng Pa le Fapa le Thlarau Thianghlim hmin in Baptisma-Tihnimnak lak ding a si (Mat. 28:19). Baptisma cu Jesuh Khrih kan zumnak Pathian hmai le minung hmai ah kan phuansuahnak a si tiah kan pom.

  2. Baptisma ih sullam cu Jesuh Khrih thihnak, thlansung ihsin a thawhsalnak langternak a si (Kolose 2:12). A thihnak ah kan thi ih a thawhsalnak ah kan thosal a si ti langternak a si (Rom 6:4).

  3. Jesuh Khrih ih in cahta vekin amah a zumtu hmuahhmuah cu Baptisma pek ding a si (Marka 16:16).

Bawipai’ Zaanriah (The Lord’s Supper)

  1. Bawipai’ Zaanriah cu Jesuh Khrih kan hrangih a tuarnak le a thihnak langtertu a si tiah kan pom (1Kor. 11:26). Hih a tuarnak theih ringringnak dingah hmanmi a si. Bawipai’ Zaanriah kan hmannak thawngin thlaraulam ah thazaang ngahnak le hlawknak kan nei a si tiah kan zum (Marka 14:22-24).

  2. Jesuh Khrih cu i rundamtu le ka Bawipa a si ti a zum ih Pa le Fapa le Thlarau Thianghlim hmin in Baptisma-Tihnimnak a ngahtu pawl lawngin hman ding a si (1Kor. 11:28).

Kawhhran Bylaws (Church Bylaws)

VI. Kawhhran Sungtel

Kawhhran Sungtel Sinak

  1. Falam Christian Church of Chicago ih zumnak thupom, thurin, daan hrampi le fehdaan pawl a pomtu cu kawhhran sungtel a si thei. Sungtel si a duhtu hmuahhmuah cu pastor asilole deacon hnenah sungtel sinak ding thu a sim pei ih membership form a ngan ṭheh hnu-ah deacon/ pastor hnenah a pek ding.

  2. Kawhhran 2 ah sungtel a si thei lo pei. FCCC ah sungtel si a duh ahcun FCCC lawngah sungtel a si pei.

Kawhhran Sungtel Sinnak Ih Ṭuanvo

  1. Falam Christian Church of Chicago ih sungtel a situ cu Christian nuncan ziaza ṭhate ih a nungtu a si ding. Duhdawtnak, rualremnak, Pathian ram karzainak, le Pathian hmin sunlawinak hrangah a nungtu a si ding. Pathian thu zirhmi vekin nun a zuamtu a si ding.

  2. Kawhhran ih biakkhawmnak Zarhpi sun ah siseh, kawhhran ih tuahmi khawmnak dang khal ah siseh, tel ringringtu a si ding.

  3. Thawhlawm le ṭhenhran ṭhenkhat ah supmi nei loin dikte in a petu a si ding. Special sumkhon-awk ah siseh, poipeng le cakkhai hrangah siseh pek a zuamtu a si ding.

  4. Siatni le ṭhatni ah sumpai le mah minung rori in tel a zuamtu a si ding.

Kawhhran Sungtel Sinak Ih Covo

  1. Kawhhran sungtel baptisma la zotu hmuahhmuah cu kawhhran hruaitu hril-awknak ah vote a pe thei.

  2. Kawhhran ṭhansonak le Pathian hnaṭuannak ah thu a bur thei ih a rel ve thei.

  3. Siatni le ṭhatni ah kawhhran ih tuah ṭulmi hmuahhmuah cu kawhhran in a tuahsak pei.

  4. Kawhhran sungtel sungih baptisma la zotu kum 18 tlun hmuahhmuah cu deacon a ṭuan thei pei.

Nunsimnak Le Banternak

  1. Falam Christian Church of Chicago thurin, thupom, daan hrampi le Christian nundaan ding ih a nung lotu cu pastor in a leng pei ih thuruah-awknak (counseling) a nei pei.

  2. A nunnnak a thlengh-aw cuang lo asile deacon thawn leng in nunsimnak le forhfialnak a um pei.

  3. Hih hnu-ah a thlengh-aw cuang lo asile kawhhran sungtel sinak ihsin a langte’n colhter/banter a si pei.

  4. Kawhhran sungtel pakhat cu hmun dang ah a ṭhawn ih FCCC sungtel ihsin a bang duh asile a bannak ca a dil pei ih kawhhran khal in transfer ca ṭhate’n a pek ding.

  5. Kawhhran sungtel a situ cu zarh tin khawm ding asinain remcan lonak phunphun ruangah hmante’n a khawm thei lo hmanah, thla 6 ah veikhat tal cu a khawm pei. Thla 6 sung a khawm lo, ṭhenhra ṭhenkhat le thawhlawm dang a pe lo asile sungtel sinak ihsin banter a si pei.

  6. A ṭhawn le a suak zo hnu-ah luhsal a duh asile a thar in membership form a ngan ding ih pastor/deacon hnenah a pesal pei.

Ṭhit-umnak

  1. A thianghlimmi ṭhit-umnak cu Biakinn pulpit hmai-ah tuah dingmi a si.

  2. FCCC sungtel sungin ṭhit-umnak neih a duhtu pawl cu a malbik zarhhnih duh ah pastor asilole deacon hnenah theihter ding a si.

  3. A ṭhi-awtu ding pawl in hmun dang ih um an lainatmi pastor sawm an duh asile tualsung kawhhran pastor le deacon hnenah an dil ding.

  4. Ṭhit-umnak zianghman um lo/tuah lo ih mah pahnih lungkimnak ih hmunkhat ah nupa vekih um (living together) pawl cu Biakinn pulpit hmai-ah ṭhit-umnak um lo/ tuah lo ding a si pei. Fellowship Hall, innsang tivek ah pastor thlacam saknak thawn tuah sawn ding a si.

  5. FCCC in mipa le mipa, nunau le nunau ṭhit-umnak (gay & lesbian marriage) kan pom lo.

Kawhhran Hruai-awk Daan (Structure)

FCCC Kawhhran hruai-awknak ahcun:

  1. Pastor

  2. Deacon

  3. Nubu

  4. Mino

  5. Mission Committee

  6. CE Committee le a dang Sub-committee pawl an si ding.

Pastor Ih Ṭuanvo Le Covo

  1. Pastor cu a hnaṭuantu dingah Pathian ih kawhmi a si tiah kan pom. Pathian in a hnaṭuantu dingah a kawh vekin kannih FCCC khal in kan kawhhran ah Pathian hnaṭuantu dingin kan kawh vemi a si. Curuangah hih kawhhran ah ṭuanvo neitubik cu pastor a si.

  2. Pastor cu kawhhran mipi pawl thlarau, thinlung, ruahnak, le tisa lamah an harhdam ih an ṭhanso theinak dingah ṭuanvo neitu a si.

  3. Pastor cu kawhhran sungah Pathian thuthangṭha sim ringringtu ding a si. A phuansuah dingmi thuthangṭha cu Bible siarnak, thlacamnak, hrilhfiah (commentary) siarnak thawn caan hmang in timtuahnak a nei pei.

  4. Bible thuhla, Christian thuanthu le Christian nundaan khal ah zirhtu ding a si.

  5. Baptisma-Tihnimnak le Bawipai’ Zaanriah petu ding a si. Thihhloh caan khal ah phumtu ding a si pei. Ṭhit-umnak khal ah inntek pastor ṭuanvo a si.

  6. Siizung ah siseh, inn lamah siseh midam lo, thanau, derthawm, khawm daithlangtu pawl a vehvai ding.

  7. Mi a vehvai tikah deacon a sim thei ih a sawm thei asile a ṭha.

  8. Pastor cu committee tinkim meeting ih an thurelmi a theih hrimhrim ding a si.

  9. Pastor cu meeting caan ah vote a pe thei lo pei.

  10. Kumkhat a ṭuan hnu lawng ah colhcaan (vacation) ni (10) a ngah thei pei. Kumthum a ṭuan hnu-ah thla (1) a ngah thei pei. Kumhra a kim ah thla (3) (Sabbatical leave) a ngah ding. Vacation lak ding tikcu caan cu deacon asilole Church Council  in an relsak ding.

  11. Pastor cu kum (67) an kim hnu cun pension a dil thei pei. A ṭuan duh lai asile kawhhran lungkimpinak in a ṭuan peh pei.

Pastor Lakluh Daan

  1. FCCC kawhhran ih Pastor cu Falammi le Falam ṭong thiamtu a si ding ih Pathian thuhla lamah BTh le a tlunlam zirnak neitu a si ding. 

  2. Rittheih thil le zukhmuam thil hmang lotu a si pei.

  3. Nu le pa sinak ah rin-um zettu a si pei.

  4. Pastor lakluhnak dingah mipi vote 2/3 ngahtu a si ding.

  5. A hlawhman cu deacon asilole Church Council in a rel ding ih, mipi ih nemhngeh a si ding. 

  6. Pastor pension cu a thlahlawh ih 16% cu Ministers and Missionaries Benefit Board (MMBB) ah kawhhran in a retsak pei.

  7. Pastor term a um lo pei. Asinain pastor lakluh daan pawl a buar asile a daan vekin relsak a si ding ih thla (6) hlankhan in theihter ding a si pei (1st Amendment 2020).

Associate Pastor

  1. Senior Pastor thawn thinkhat lungkhat in ṭuan theitu a si pei.

  2. Rittheih thil le zukhmuam thil  hmang lotu a si ding.

  3. Nu le pa sinak ah rin-um zettu a si ding.

  4. Associate pastor lakluhnak dingah mipi vote 2/3 ngahtu a si ding.

  5. A hlawhman cu deacon asilole Church Council in a rel ding ih,   mipi in an nemhnget pei.

  6. Associate pastor cu meeting tinkim ih an thurelmi a theih    hrimhrim ding a si.

  7. Associate pastor cu kum (67) a kim hnu cun pension a lak thei pei.

  8. A pension hrang dingah a hlawhman ih 16% cu Ministers and Missionaries Benefit Board (MMBB) ah kawhhran in a retsak pei.

  9. Meeting caan ah vote a pe thei lo pei.

  10. Pastor kumkhat a ṭuan hnu lawngah colhcaan (vacation) ni (10) a ngah pei. Kumthum hnu-ah thla (1) a lak thei pei. Kumhra kimnak ah thla (3) (Sabbatical leave) a lak thei pei.

  11. Vacation lak ding tikcu caan cu deacon asilole Church Council in rem an ti daan in relkhawm a si ding.

General Council

  1. Mipi/senpi meeting (General Council meeting) cu a malbik ah kumkhat veikhat neih ding a si.

  2. Kumtin neihmi senpi meeting (General Council meeting) veikhat tlunah a ṭul daan ih zir in senpi meeting cu neih ding a si.

Church Council

  1. Senpi meeting (General Council) ai-awtu ahcun Church Council hi a si.

  2. Church Council sungah  deacon le department tinkim ih   chairperson le secretary pawl an tel ding a si.

  3. Church Council meeting cu thla (4) veikhat neih ding a si.

Hril-awk Daan

  1. Kawhhran sungih hnaṭuannak ah tluangte le remte ih a feh theinak dingah Deacon, Nubu upa, Mino upa, Mission Committee, CE Committee pawl le a dang Sub-committee pawl hi term bangrep ah thok in bangrep ah cem ding a si.

  2. An term pawl cu kum (2) an si ding.

  3. Nominating Committee in hril in ruang a zing pei ih mipi khal in hril-awk tikah an duhmi pawl an thulut thei.

  4. Deacon cu misenpi ih hril ding a si.

  5. Kawhhran department le committee pawl cu misenpi asilole anmahte in an hril-aw pei.

Deacon

  1. Deacon cu Pathian ram karhzainak dingah siseh, a hmin sunlawinak ding hrangah siseh, kawhhran mipi pawl taksa, thinlung, le thlaraulam ih an ṭhaso theinak dingah theitawk suah in pastor thawn ṭuantlangtu a si pei.

  2. Pastor um lo khal ah Pathian thuthangṭha sim theitu le thlacam theitu a si pei.

  3. 1Timote 3 sungih um vekin deacon cu zumnak lamah nun thianghlim, zohṭhimtlak ih nungtu a si ding.

  4. Deacon cu 7-12 tiang hril an si pei.

  5. Hrilmi deacon sung ihsin anmahte Office Bearer an hril-aw pei.

Office Bearer

  1. Hotu (Chairperson)

  2. Hotu Sang (Vice Chairperson)

  3. Sungṭuan (Secretary)

  4. Sungṭuan Bawmtu (Assistant Secretary)

  5. Sumkiltu (Treasurer)

  6. Sumkil Bawmtu (Assistant Treasurer)

i. Hotu (Chairperson)

  1. Pastor hnaṭuan bawmtu le theihpi ringringtu a si pei.

  2. Kawhhran meeting tinkim ah meeting kaihruaitu a si pei.

  3. Committee ih tuah dingih an relcatmi pawl pastor le secretary thawn thuron-aw in ṭuantlangtu a si pei.

  4. Meeting agenda pawl khal pastor le secretary thawn reltlangtu a si pei.

  5. Kawhhran ih theih ṭulmi thuhla pawl ah pastor thawn thutheitu a si pei.

ii. Hotu Sang (Vice Chairperson)

  1. Hotu (Chairperson) bawmbiktu a si pei.

  2. Hotu (Chairperson) a um lo tikah meeting hohatu a si pei.

  3. Hotu (Chairperson) a um khal ah a caancaan ah meeting kaihruaitu a si pei.

  4. Thu pakhatkhat ruangah Hotu (Chairperson) in a hnaṭuan a bansan asile Hotu dinhmun a la pei.

iii. Sungṭuan (Secretary)

  1. Pastor le Hotu pawl ronta in meeting a ko pei.

  2. Meeting ah thurelcatmi pawl ṭhate le fiangte’n a ngankhum pei.

  3. Meeting ih thurelcatmi pawl mipi hnenah a than pei.

  4. Meeting ih thurelcatmi pawl ṭuansuak dingah simthantu (reminder) a si pei.

  5. Ca lut le ca suak pawl ṭhate’n a ret pei ih a kilkhawi ding.

iv. Sungṭuan Bawmtu (Assistant Secretary)

  1. Sungṭuan hnaṭuan bawmtu a si pei.

  2. Sungṭuan a um lo caan ah a ai-awh pei.

  3. Meeting thurelmi pawl ngan a ṭul tikah a ngankhum pei.

  4. Kawhhran neihmi thilri pawl cazin kaitu a si pei.

  5. Sungṭuan in a hnaṭuan a colhsan asile Sungṭuan a si pei.

v. Sumkiltu (Treasurer)

  1. Kawhhran sumpai cu felzet le rinsan umzet ih kilkhawitu a si pei.

  2. Kawhhran sumlut hmuahhmuah cu Bank ah a ret thluh pei. Sumsuak pawl cu Check nganmi hlir in a suakter pei.

  3. Kawhhran sumlut le sumsuak pawl ṭhate’n a ngankhum ringring pei. Receipt pawl khal ṭhate’n a ret pei.

  4. Deacon ih relcatmi le lungkimpi lawngah kawhhran sumpai a hmang pei.

  5. Kawhhran ih sumlut pawl cu zarh tinte Bank ah thanlut pei.

  6. Kawhhran meeting hmuahmuah ah sumpai umdaan report a pek pei.

  7. Department tinkim le committee pawl ih sumpai khal a kil pei.

vi. Sumkil Bawmtu (Assistant Treasurer)

  1. Sumkiltu ih hnaṭuan a bawm pei. Zarhtin thawhlawm le ṭhenhra ṭhenkhat pawl siar a bawm ringring pei.

  2. Sumkiltu a colh asile Sumkiltu a si pei.

  3. Kawhhran sumlut-sumsuak cazin a nei thluh ve pei.

Sum Cazin Zohfeltu (Auditor)

  1. Kawhhran ih sumlut le sumsuak pawl zohfeltu (auditor) cu minung (2) hril a si pei ih kumkhat ah veihnih neih ding a si pei.

Nubu (Women Department)

  1. Kawhhran dinfeknak dingah le cahnak ding ahcun Nu pawl hi an thupi ngaingai ih Nubu cu neih tengteng ding a si.

  2. Nubu khawmnak caan cu an remcan daan in an nei pei.

  3. Hrilmi sung ihsin Office Bearer cu an hril-aw pei.

  4. Nubu ih chairperson le secretary cu Church Council ah member an si pei.

  5. Nubu meeting caan ah kawhhran palai an sawm pei.

Evangelism & Mission Department

  1. Jesuh Khrih ih in fialmi cu rundamnak thuthangṭha phuansuah ding le zirh ding hi a si ih, E&M department cu kawhhran cangvaihnak le hnaṭuannak ah a thupizetmi a si.

  2. E&M department in kawhhran sung ṭhangphawknak ding thuhla a tawlrel pei.

  3. Mission hnaṭuannak ding an tawlrel pei ih sumpai khal an hawl pei.

  4. Committee member cu minung (7) tiang an si pei.

Mino (Youth Department)

  1. Kawhhran ih hmailam nunnak cu tuihsun ih mino pawl ah a um vekin Mino pawlkom (Youth department) cu neih tengteng ding a si.

  2. Mino khawm caan cu an remcan daan in an nei pei.

  3. Hrilmi sungin Office Bearer an hril-aw pei.

  4. Mino chairperson le secretary cu Church Council ah member an si pei.

Christian Education-CE Department

  1. Nauhak pawl Christian nundaan ih an nun theinak dingah kawhhran sungah ṭuanvo a latu ding cu CE department a si.

  2. CE department in zirhtu ding saya/ma pawl le zirh dingmi ca pawl khal a tawlrel pei.

  3. Zirhtu saya/ma pawl training ding a tawlrel pei.

  4. CE pawl ziang an bang timi thlakhat ah veikhat in zohnak le vehvainak a nei pei.

  5. CE department ih chairperson le secretary cu Church Council ah member an si pei.

Committee Dang Pawl (Sub-Committee)

Kawhhran ih ṭuldaan zir in Sub-committee pawl tawlrel a si pei. A ṭul daan in:

  1. Property & Finance committee

  2. Music committee

  3. Outreach committee

  4. Calai committee le a dangdang pawl

Hih committee ih chairperson le secretary pawl cu Church Council ah member an si lo pei. Hih committee ih chairperson le secretary cu deacon sungin a si thei le a ṭha. Ziangahtile an thurelmi pawl kha Church Council ah thuthun duhmi pawl an thun thei ding ruangah a si.

Kawhhran Le Department, Committee Pawl Pehtlaih-awknak

  1. Department tin le committee in caangvaihnak an nei ding asile kawhhran ah ca thawn dilnak a nei pei.

  2. Department le committee pawl ih sumpai cu kawhhran sumkiltu (Church Treasurer) hnenah ret thluh a si pei.

Daan Remsalnak

FCCC ih neihmi Constitution le Bylaw pawl cu remsal a ṭul tikah siseh, betsal a ṭul tikah siseh, hlon ṭulmi pawl hlon caan ah siseh, kawhhran zapi ih 2/3 lungkimpinak lawngin hlon, bet, le rem ding a si pei.

FCCC  A Um Nawn Lo Tikah

Nikhatkhat ah Falam Christian Church of Chicago [FCCC] hi a um nawn lo asile  thil neihmi hmuahmuah le sumpai pawl cu Christian biaknak pakhatkhat (any Christian Charity Organization) ah pek a si pei.